’tulipo. Tunakoelekea. 5 tafakuri ya kila wiki. Maliasili-ni-ya-sisi-sote

28/07/2024

Maliasili ni ya wote

Kwa matumuzi ya sisi sote. 

Maliasili si yangu au yako au ya binamu

Wala shangazi au mjomba

Maliasili ni ya sisi sote. 

Maliasili sio kitu cha kuhodhi

Wala mali ya kumiliki. 

Maliasili sio bidhaa ya kuyauza

Au kuyapigia bei mnadani

Wala ya kuwekea dhamana mikopo. 

Maliasili sio bidhaa ya kubinafsisha

Au kuyagawa kwa wawekezaji.

Au kuyazawadia mwanawe. 

Maliasali ni urathi wa wote

Kwa matumizi ya sisi sote. 

Ubepari umepora maliasili zetu

Ardhi, madini, mafuta na misitu.

Miito, milima, hewa safi na maji

Yote kwa mabepari ni mali ya kuhodhi.

Kuzalisha faida bila kikomo. 

Tukombowe maliasili zetu

Tuzuie uporaji wa maliasili zetu.

Tusitishe ubinafsishaji wa urathi wetu

Tukomeshe uharabifu wa miito na maji yetu.

Turejeshe maliasili kwa umma. 

Tusiweke rehani maliasili zetu

Tusichezee hatma ya vizazi vyetu.

Karne tano za uporaji na utesaji inatosha.

Sasa tuamke: tufichue mafisadi na wasaliti

Tuvue nguo wapigadili na wanafiki. 

Tumechoka na maneno matamu 

Na matendo mabovu.

Tumechoka na wimbo wa maendeleo

Pasipo na utu wala ustawi

Haki wala usawa. 

‘Maliasili-ni-ya-sisi-sote’

Kwa matumizi ya pamoja ya jamii zetu

Na vizazi vyetu vijavyo. 

Wimbo wetu ni moja, tuimbe pamoja

‘Maliasili-ni-ya-sisi-sote’.

Kaulimbiu yetu ni moja, tuipigie kelele pamoja

‘Maliasili-ni-ya-sisi-sote’.

Dai letu ni moja, tulipiganie kwa nguvu zetu zote

‘Maliasili-ni-ya-sisi-sote’.

*Sing together, act together, fight together:

‘Make Commons a category of common language’.*